Trending News

काठमाडौंमा बिहीबार पनि घर फर्कने सर्वासाधारणहरुको भिड

0 Shares

काठमाडौं, 12 मई 2022

शुक्रबार हुने स्थानीय निर्वाचनका लागि बिहीबार पनि घर फर्कने सर्वासाधारणहरुको भिड देखिएको छ । स्थानीय चुनावका लागि पछिल्लो एक हप्तायता काठमाडौं छाड्नेको संख्या ५ लाख नाघेको ट्राफिक प्रहरीले जनाएको छ । भोट हाल्न जानेको सङ्ख्या बढेसँगै काठमाण्डौ उपत्यकामा चहलपहल कम भएको छ । पछिल्लो समयमा अधिकांश मतदाता राजनीतिक दलले व्यवस्था गरेको यातायातका साधनबाट गाउँ फर्किएका छन् भने कतिपय भाडाका सवारीसाधन र निजी गाडीमासमेत गइरहेका देखिएका छन् । मत हाल्ने दिन सरकारले सार्वजनिक बिदा दिएको, अर्को दिन शनिबार परेको र जेठदेखि हप्ताको दुई दिन सार्वजनिक बिदा दिने सरकारी निर्णयअनुसार आइतबार र सोमबारसमेत बिदा परेकाले पनि नागरिकहरु केही दिनको छुट्टी लिएरै गाउँ फर्किएका छन् । मुलुकका ७५३ स्थानीय तहको निर्वाचनमा कूल १० हजार ७५६ मतदानस्थल र २१ हजार ९५५ मतदान केन्द्र तोकिएको छ । सरकारले दुई हजार ९४६ अतिसंवेदनशील, चार हजार ४२३ संवेदनशील र तीन हजार ३८७ मतदानस्थल कम संवेदनशील भनेर वर्गीकरण गरी सोहीअनुसार सुरक्षा व्यवस्था मिलाएको छ ।