Trending News

फ्रान्समा आजदेखि रेष्टुरेण्टहरु खुल्ला, 22 जुनदेखि विद्यालयहरु खुल्ने, स्थगित चुनाव पनि हुने

52 Shares

पेरिस, 15 जुन 2020

फ्रान्सले अर्थव्यवस्थालाई सुधार गर्न लकडाउनलाई पूर्णरुपमा खुल्ला गर्न निर्णय गरेको छ । फ्रान्सका राष्ट्रपति एमानुएल मेक्रोनले कोरोना भाईरसबाट देशलाई मुक्त गर्न अर्थव्यवस्थालाई खोल्ने घोषणा गर्नुभएको छ । उहाँले पेरिस क्षेत्रमा सम्पूर्ण रेष्टुरेण्टहरु आजदेखि खुल्ने र ग्राहकहरुलाई भित्र बसेर सेवा प्रदान गर्न सक्ने भन्नुभएको छ । अहिलेसम्म त्यहाँ ग्राहकहरुलाई बाहिरै बसाउन मात्र अनुमति दिइएको थियो । फ्रान्सका अन्य क्षेत्रहरुमा पहिलैदेखिनै रेष्टुरेण्टहरु खुलिसकेका छन ।

 त्यहाँ 22 जूनदेखि सम्पूर्ण नर्सरी स्कूल, प्राइमरी स्कूल र जूनियर हाइ स्कूल पनि खुल्नेछन । सम्पूर्ण विद्यार्थीहरुलाई अनिवार्य उपस्थित हुन भनिएको छ । अहिलेसम्म स-सानो समूहमा विद्यार्थाहरुलाई स्कूल बोलाईंदै थिय भने अधिकांश विद्यार्थीहरु घरमै बसिरहेका थिए ।

मेक्रोनले लकडाउनका कारण स्थगित भएको स्थानीय चुनावको दोस्रो चरण 28 जूनदेखि शुरू हुने पनि घोषणा गर्नुभएको छ ।

फ्रान्स कोरोनाबाट अझै मुक्त भएको छैन । फ्रान्स कोरोना संक्रमित विश्व सूचि 13 औं स्थानमा छ भने यहाँ कोरोना भाईरसका कारण अहिलेसम्म 29 हजार 407 जनाको मृत्यु भएको छ । अहिलेसम्म कूल संक्रमित 1 लाख 57 हजार 220 जना मध्ये 72 हजार 859 जना सञ्चो भएका छन भने 54 हजार 954 जनाको उपचार चलिरहेको छ ।