Trending News

हरियाणाको पानीपतमा एक नेपालीको क्रुरतापूर्वक हत्या, हात खुट्टा बाँधिएको अवस्थामा तलाउबाट शव बरामद

12 Shares

नयाँ दिल्ली, 28 अक्टोबर 2020

हरियाणा राज्यको पानीपतस्थित खोतपुरा गाँउमा अन्दाजी 30 वर्षका एक युवकको हत्या गरिएको छ । हरियाणा पुलिसले युवक नेपाली भएको हुन सक्ने आशंका गरेको छ । प्रवासी नेपाली संघ भारत, पानीपत नगर समितिका सचिव निर्मल भुषालका अनुसार खोतपुरा गाउँ नजिकै तलाउमा बोरामा हत्या गरि फ्याकिएको अवस्थामा आज एक शव बरामद गरिएको थियो । व्यक्तिको हातखुट्टा र मुखमा पट्टी बाँधिएको थियो । पुलिसले शव कुनै नेपालीको भएको हुन सक्ने आशंका गर्दै प्रवासी नेपाली संघ भारतलाई पुलिस थाना बोलाएको थियो । पुलिस थाना पुगेका प्रवासी नेपाली संघ भारत, पानीपत नगर समितिका सचिव निर्मल भुषालले शव नेपालीको नै भएको हुन सक्ने सम्भावना धेरै रहेको बताएका छन । करिब 4 दिन अघि हत्या गरि शव फ्याकिएको अनुमान गरिएकाले त्यस यता कुनै नेपाली सम्पर्कविहीन भएको भए हरियाणा पानीपत सेक्टर 6 को पुलिस थानामा सम्पर्क गर्न भुषालले आग्रह गर्नु भएको छ । यद्धपी पुलिसले अनुसन्धान जारी राखेको छ । तर शवको पहिचान नहुञ्जेलसम्म आफुहरुले अगाडीको कानूनी कारवाहीका लागि दवाब दिन नसक्ने भुषालले बताउनु भएको छ । उहाँले पानीपतमा विगतमा नेपालीहरुमाथि क्रुरताका कयौं घटना प्रकाशमा आएकाले बरामद गरिएको शव नेपालीको हुन सक्ने आशंका गर्नुभएको छ ।