Trending News

दिल्लीमा सीए अध्ययरत नेपाली विद्यार्थीद्वारा आत्महत्या, आजदेखि शुरु हुँदै थियो परीक्षा, सुसाईड नोटमा यस्तो लेखे आत्महत्या गर्दै आमाबुवासँग मागे माफी

0 Shares

नयाँ दिल्ली, 21 जनवरी 2021

भारतको राजधानी दिल्लीमा सीए अध्ययनरत एक नेपालीले आत्महत्या गरेको घटना प्रकाशमा आएको छ । गुल्मीको चन्द्रकोट गाँउपालिका वडा नम्बर-7 रुपाकोटका वासिन्दा अन्नतराम भण्डारीका छोरा मदन भण्डारीको शव बुधवार साँझ झुण्डिएको अवस्थामा लक्ष्मीनगरस्थित उनि बस्ने कोठामा फेला परेको छ । जानकारीका अनुसार उनि विगत 8 वर्षदेखि लक्ष्मीनगरमा बस्दै सीए अध्ययन गर्दै आएका थिए ।

3 दिनदेखि घर परिवारको सम्पर्कमा नरहेका मदनले आत्महत्या कहिले गरेभने अहिले पुष्टी हुन सकेको छैन । तर नेपालमा रहेका घरका सदस्यहरुले उनको बारेमा बुझ्न उनका साथीहरुलाई आग्रह गरेपछि बुधवार उनको कोठामा पुगेका साथीहरुले झुण्डिएको अवस्थामा शव देखेका थिए । लक्ष्मीनगरस्थित शकुरपुर पुलिस थानाका अनुसार घटनास्थलबाट एक सुसाइड नोट पनि प्राप्त भएको छ । सुसाईड नोटमा उनले मानसिक तनावका कारण आत्महत्या जस्तो कठोर कदम चाल्न लागेको भन्दै आफ्ना आमाबुवालाई माफी दिन भनेका छन । सुसाईड नोटमा उनले लेखेका छन , बुवाआमा म तपाईहरुको माफीको लायक त छैन र म आफुले आफैलाई पनि माफ गर्न सक्दैन । जीवनमा नत मैले तपाईहरुलाई कहिले सुख दिन सके र अझै जीवन बाँचेपनि सायदै तपाईहरुलाई सुख दिन सक्छु । म आफुले आफैबाट हारेको मान्छे, आफुले आफैलाई जित्न नसकेको मान्छे कसरी दुनिया बसाउन सक्छु । म आफ्नो जीवनदेखि घृणा गर्छु र म आफुले आफुलाई मनभित्र-भित्रै जिउँदो मारेर बाँच्न सकिन । उनले अगाडी आफ्नो अपराधको लागि माफी गर्न आमाबुवालाई आग्रह गरेका छन ।  

मृतक मदनका मिल्ने एक साथी मनोज केसरीका अनुसार उनिसँग आइतवार अन्तिम पटक भेट भएको थियो । तर उनि सामाजिक संजालमा भने सोमबार अन्तिम पटक एक्टिभ देखिएका थिए ।

दिल्लीका समाजसेवी रघुनाथ पाण्डेयका अनुसार शवलाई नेपाल पठाउने तयारी भइरहेको छ । घटनापछि आज विहान पुलिस थाना पुग्नु भएका पाण्डेयले शव दिल्लीको तीस हजारीस्थित शव गृहमा राखिएको र भोली पोस्टमार्टमपछि शवलाई नेपाल पठाइने बताउनुभएको छ ।

मृतक मदन घरको एक्लो छोरो भएको भनिएको छ । उनका 3 दिदीबहिनीहरु छन । जानकारीका अनुसार मदनको सीए अध्ययन पुरा भएको थिएन । आजदेखि सीएको परीक्षा पनि शुरु भएको छ । यो परिक्षामा उनले सहभागिता जनाउने कुरा भएकाले उनको आत्महत्यालाई यो परीक्षासँग पनि जोडेर हेरिएको छ ।