Trending News

ब्रिटेनका राजकुमार ह्यारी र उनकी पत्नी शाही पदबाट मुक्त

0 Shares

नयाँ दिल्ली, 20 फेब्रुअरी 2021    

बेलायतका राजकुमार ह्यारी र उनकी श्रीमती डचेस अफ ससेक्स मेगन मर्कलेबाट सबै शाही पदवी फिर्ता लिइएको छ । बेलायतको शाही परिवारको जिम्मेवारीबाट छुट्टिने घोषणा गरेपछि उनिहरुमाथि कारवाही हुने अनुमान गरिएको थियो । 2020 को शुरुवातमा महारानीसँग भएको एक बैठकमा ह्यारीले शाही परिवारबाट टाढा जाने आफ्नो निर्णयलाई एक वर्षसम्म समिक्षा गर्ने सहमति गरेका थिए । शुक्रवार महारानी एलिजावेथ द्वितीयले राजकुमार ह्यारी र उनकी पत्नी राजकुमारी मेगन मर्कलेबाट शाही पदवी फिर्ता लिइएको घोषणा गरेकी हुन् । ह्यारीकी हजुर आमा महारानी एलिजाबेथ द्वितीयका तर्फबाट जारी एक बयानमा बकिंघम प्यालेसले भनेको छ, राजकुमार र राजकुमारीले महारानीलाई आफ्नो निर्णयबारे अवगत गराएका छन । दुवै जनाले राजशाहीबाट सम्बन्ध तोड़ने घोषणा गरेको आगामी महिना एक वर्ष पुरा भइरहेको छ ।

94 वर्षीय महारानीले आफ्नो निर्णयको बारेमा उनिहरुलाई पत्र पनि लेखेकी छिन । सो पत्रमा उनिहरु फिर्ता नभए उनिहरुको सबै मानार्थ सैन्य पद र राजशाही पदहरु शाही परिवारका अन्य कार्यकारी सदस्यहरुलाई प्रदान गरिने भनिएको छ । बकिंघम प्यालेसका तर्फबाट जारी बयानमा भनिएको छ, राजकुमार ह्यारी र राजकुमारी मेगन मर्कलेले आफुहरु शाही परिवारको कार्यकारी सदस्यका रुपमा नफर्कने महारानीलाई पुष्टि गरेका छन । जानकारीका अनुसार राजकुमारसँगको संवादपछि महारानीले उनिहरुलाई पत्र लेखेर शाही परिवारबाट अलग भएर सार्वजनिक जीवनको जिम्मेवारी र कर्तव्य वहन गर्न उनिहरुका लागि सम्भव नहुने भनेकी छिन।

मानार्थ सैन्य पद र राजकुमार एंव राजकुमारीको शाही पद महारानीलाई फिर्ता गरि शाही परिवारका अन्य कार्यकारी सदस्यहरुलाई वितरण गरिनेछ । राजकुमार ह्यारीलाई कयौं सैन्य उपाधि र कोमनवेल्थसँग सम्बन्धित नियुक्तिसहित कयौं अधिकार प्राप्त थियो भने उनकी पत्नी मेगनलाई पनि कयौं मानार्थ उपाधिहरु प्राप्त थियो । राजकुमार ह्यारीलाई बेलायतको रोयल मरीनको क्याप्टेन जनरल बनाइएको थियो । उनीहरुले अब सबै शाही सुविधा त्यागेर आम नागरिकको जीवन बिताउने फैसला गरेका हुन । राजकुमार ह्यारी र उनकी पत्नी मेगनले एक वर्षको अवधिमा अमेरिकामा कयौं कम्पनीहरुमा आवद्ध भएर नया जीवन शुरू गरेका छन । उनिहरु अहिले कैलिफोर्नियामा रहिरहेका छन ।