Trending News

नेपालको पछिल्लो राजनीतिक घटनाक्रमबारे भारतको दिल्लीमा लामो परामर्श

0 Shares

काठमाडौं, 17 सितम्बर 2021

नेपालको पछिल्लो राजनीतिक घटनाक्रमबारे भारतको राजधानी नयाँ दिल्लीमा लामो परामर्श चलेको छ । नेपालमा बढेको चिनियाँ प्रभाव र त्यसकारणले समस्या उत्पन्न भएको भन्दै भारतीय सत्ताले पश्चिममा राष्ट्रहरुसँग समेत समन्वय गरेर परामर्श जारी राखेको बताइएको छ । यही परामर्शका लागि भनेर नेपालका लागि भारतीय राजदूत विनयमोहन क्वात्रा दिल्ली आएका छन् । झण्डै दुई साता लामो सो परामर्शको सिलसिलामा नेपालमा चीनको बढ्दो प्रभाव र दबाबलाई मूल विषय बनाइएको बताइएको छ । स्रोतले कुन कुन पश्चिमा राष्ट्रका प्रतिनिधिहरु यस्तो परामर्शमा सहभागी छन् भन्ने नबताए पनि चीनको सक्रियतालाई देखाएर नेपालबारे ठूलै हाउगुजी सिर्जना गर्न लागिएको त होइन भन्ने आशंका पनि शुरु भएको छ । राजदूत क्वात्रा दिल्लीबाट नेपाल फर्केपछि भारतको नेपाल नीतिमा भएको तत्कालको परिवर्तन समेत देखा पर्ने स्रोतको दावी छ । प्रधानमन्त्री भएको दुई महिना हुँदा पनि मन्त्रिपरिषद्समेत गठन गर्न नसकेर हैरान भएका प्रधानमन्त्री देउवाको सत्तारुढ गठबन्धनमा आउने सम्भावित खटपट र त्यसले फेरि संसद भंग गर्नुपर्ने अवस्था आउन सक्नेतर्फ भारतीय संकेतलाई देउवा र गठबन्धनका नेताले कसरी व्यवस्थापन गर्न सक्लान् भन्ने चासो पनि दिल्ली परामर्शसँगै प्रकट हुन थालेको छ । नेपालमा अमेरिकी सहयोगसम्बन्धी परियोजना एमसीसीबारे अत्यन्त धेरै अफवाहहरु फैलिएको र त्यसको पछाडि चीनले भूमिका खेलेको, एमसीसीबारे नभएका कुराहरु पनि भएजस्तै गरेर मिसइन्फर्मेशन क्याम्पेन नै चिनियाँ लगानीमा गरिएको केही तथ्यहरुसमेत संकलन गरेर दिल्लीमा पश्चिमा मुलुकका प्रतिनिधिहरुसँग छलफल गरिएको स्रोतको दावी छ ।