Trending News

कांग्रेसको घोषणापत्र : संसद विघटन नगर्ने प्रतिज्ञादेखि साढे १२ लाख नयाँ रोजगारीसम्म

0 Shares

काठमाडौं, 29 अक्टूबर 2022

नेपाली कांग्रेसले आगामी पाँच बर्षका लागि आफ्नो चुनावी घोषणापत्र सार्वजनिक गरेको छ । आउँदो चुनावपछि पनि कांग्रेसकै नेतृत्वमा सरकार बन्ने दाबी गरिएको घोषणापत्र पार्टीका सभापति र प्रधानमन्त्री शेरबहादुर देउवाले सार्वजनिक गरेका हुन् ।

घोषणापत्रमा कांग्रेसले सूचनाप्रविधि, उद्योग, पर्यटन, निर्माण यातायातलगायतका क्षेत्रमा वार्षिक साढे दुई लाख नयाँ रोजगारी सिर्जना गर्ने, सात प्रतिशतको आर्थिक वृद्धि हासिल गर्ने बताएको छ ।

लाखौंको संख्यामा रोजगारी सिर्जना गर्न ठूलै संरचनात्मक पहल चाहिने भन्दै सो पार्टीले आर्थिक क्षेत्रको विद्यमान नीतिगत, कानुनी र प्रक्रियागत अड्चनमा व्यापक सुधार गरी कम्तिमा पनि सात प्रतिशतको आर्थिक वृद्धि गर्ने बताएको छ ।

नयाँ रोजगारी सिर्जनाका लागि सञ्चालनमा रहेका उद्योग, निजी क्षेत्रका छाता संगठन, सीटीईभीटी र स्थानीय सरकारसँगको सामूहिक पहलमा अप्रेनटिससीप कार्यक्रम र रोजगारी सिर्जनाका लागि बजारले मागेको युवाले रोजेको तरुण सीप वृत्ति कार्यक्रम ल्याउने बताउँदै कांग्रेसले घोषणापत्रमा नारा ‘संविधान रक्षा,स्थिरता र समुन्नतिको आधार, नेपाली कांग्रेसकै नेतृत्वमा अबको सरकार’ बनाएको छ ।

घोषणापत्रबारे जानकारी दिँदै महामन्त्री विश्वप्रकाश शर्माले घोषणापत्रको ‘थिम’ निरन्तरतामा नविनता रहेको बताए । उनले घोषणापत्र निर्माणमा सबै समुदाय र उमेर समूहको तथा विज्ञहरुको सहभागिता रहेको बताए ।

५२ पेज लामो घोषणा पत्रमा संसद विघटन नगर्नेसमेत प्रतिबद्धता जनाएको छ । ‘एमाले राज्य सञ्चालन गर्न असमर्थ छ’ घोषणा पत्रमा उल्लेख छ ।’

घोषणापत्र महामन्त्री विश्वप्रकाश शर्मा नेतृत्वमा रहेको ४१ सदस्यीय समितिले तयार पारेको हो । अर्थशास्त्री तथा योजना आयोगका पूर्व उपाध्यक्षहरू डा. स्वर्णिम वाग्ले, डा. गोविन्द पोखरेल, शिक्षााविद् डा. कृष्णप्रसाद पौडेल, राजनीतिक विश्लेषक तथा वैदेशिक मामिला जानकार गेजा शर्मा वाग्ले, शंकर तिवारीलगायत काँग्रेस नेताहरुले घोषणापत्र तयार गरेका हुन् ।