मागेजति मन्त्रालय नपाए एकीकृत समाजवादी सरकारमा सामेल हुँदैन
काठमाडौं, 24 मार्च 2023
पूर्वप्रधानमन्त्री एवं नेपाल कम्युनिष्ट पार्टी एकीकृत समाजवादीका सम्मानित नेता झलनाथ खनालले मागेजति मन्त्रालय नपाए एकीकृत समाजवादी सरकारमा सामेल नहुने बताएका छन् । कार्यकर्ता प्रशिक्षणका लागि पाँचथर पुगेर खनालले सञ्चारकर्मीसँगको कुराकानी गर्दै यस्तो बताएका हुन् । पूर्वप्रधानमन्त्री समेत रहेका खनालले तीनवटा मन्त्रालय र उपनिर्वाचनमा एक सिट आफ्नो पार्टीले पाउनुपर्ने बताए ।
‘एकीकृत समाजवादी पार्टीले खेलेको भूमिकाबाट यो सरकार निर्माण भएको हो,’खनालले भने, ‘हाम्रो योगदानलाई बेवास्ता गरे एकीकृत समाजवादी सरकारमा सभागी हुँदैन ।’
उनले प्रचण्ड नेतृत्वको सरकार लामो समयसम्म चल्न नसक्ने संकेत गरेका छन् । कुनै पनि दलको बहुमत नभएकाले सरकारको आयु लामो नहुने खनालको तर्क थियो । ‘कुनै पनि दलको बहुमत नपुग्नु ठूलो दुर्भाग्य हो,’खनालले भने,‘वर्तमान सरकार धेरै दलहरूलाई मिलाएर गठन गरिदैछ । यस्तो परिस्थितिमा कुन दल कतिखेर भड्किन्छ र सरकार ढल्छ भन्ने टुंगो छैन् ।’
‘कोशी’ प्रदेशको नामको विषयमा बहस आवश्यक रहेको तर,नाम परिवर्तको विषयमा आन्दोलन गर्नु असान्दर्भिक भएको खनालले बताए । पछिल्लो राजनीतिक समिकरण अनुसार सबै प्रदेशहरूमा नयाँ सरकार गठन हुने उनको भनाइ छ ।
कोशी प्रदेशमा नयाँ सरकार गठन गर्न सकंट रहेको खनालको ठम्याइ छ ।
संकट समाधानका लागि दलहरूले छलफल गरेर दीर्घकालिन समाधानको बाटो खोज्नुपर्ने खनालको तर्क छ।
